Pois xa está. Os que estivestes en AstroGalicia17 algo vos cheirastes. Os que non, ninflowers! Pero xa teño en marcha o meu novo proxecto de divulgación científica e astronómica.
Ceos Galegos é un proxecto de comunicación social da ciencia ao través de fotos, imaxes e visións do ceo. O ceo diúrno, o ceo nocturno, as nubes, as tormentas, os fenómenos atmosféricos extremos, todo ten e terá cabida neste proxecto. As imaxes son propias ou aportadas polos colaboradores e amigos. Os textos son de creación propia agás indicación do contrario. Polo pronto, xa temos no mercado para a súa compra un "calendario astronómico 2018".
Non sei se será o único calendario astronómico editado no país, o único en galego, o único con imaxes de afeccionados e profesionais, o único con efemérides astronómicas adaptadas a Galicia, o único con textos breves explicativos da ciencia por tras de cada foto, o único... Pero seguro que algo diso o é.
O que si sei é que, e podedes confirmar os que o tivestes na vosa man, se trata dun produto fermoso, bonito, útil e moi chulo. E xa sabedes que non son moito de presumir nas redes dos traballos propios. Pero neste caso, como eu teño o menor dos méritos (simplemente fago a edición), a fermosura está nas imaxes dos contribuíntes (Óscar, Alfredo, Ángel e outros) e no deseño gráfico do profesional.
Na web de Ceos Galegos tedes mostra dalgunha das súas páxinas. A ver como resulta o proxecto e agardo que vos guste.
Evidentemente, agradécese todo comentario, crítica (se é construtiva mellor), ideas de futuro... ben neste mesmo foro ou enviando un correo ao proxecto directamente info ALGARROBA ceosgalegos.com
Ah, e se nos seguides en twitter (@ceosgalegos) pois moito mellor. Tamén andamos polo instagram e polo feisbuc (pero este último é un sindiós de ruído).
Un saúdo.
