Pois si. Parecía complicado cando empezamos, alá por abril do 2011... pero xa levamos 1.000 fotos diarias e consecutivas na versión galega do APOD da NASA (o Astronomical Picture Of the Day). Só nos queda seguir co traballo e animarvos a que non deixedes de botarlle unha ollada á foto diaria, a comentala (na propia páxina), a difundila e, incluso, a colaborar. No seu momento, a idea de preparar unha versión galega do APOD da NASA xurdiu polos defectos e faltas de traducións que estaba a ter a versión española (que parece que xa están solventados) e, sobre todo, para apoiar a este foro, á web do AstroGalicia e ir creando vencellos na comunidade astronómica galega.
Entre algún dos nosos pequenos fitos, ser quen de manter a publicación diaria durante o peche que tivo a administración norteamericana que durante un par de semanas impediunos deixar preparada a tradución desde o día anterior. Ou canto un furacán nos Estados Unidos deixou tirado o servidor da NASA orixinal e a páxina en galego entrou puntual, porque deixáramos gardadas a previsións de publicacións dos seus creadores. Ata a versión en castelán se fixo daquela (como outras veces :666:) traducindo desde a versión galega.
Lémbrovos que o APOD da NASA leva en funcionamento desde o ano 1995, todos os días. Ou sexa, desde o paleolítico internetero. De feito, conserva un deseño da páxina cun regusto retro que é toda unha homenaxe ao sinxelo pero funcional (que non fomos capaces de reproducir na versión galega).
Só nos queda que algún día poidamos ver publicada a foto dalgún dos integrantes deste foro. Por certo, tedes probado a enviar a algunha imaxe vosa ao APOD? Porque, a verdade, teño visto por aquí algunha moi boa, moi curiosa e moi instrutiva.
Vale, quedan máis cousas por facer, pero imos paseniño.
Gracias a todos os que a mirades de cando en vez, os que comentades, os que avisades de erros (teño que mirar máis o feisbuc)... Ah!... e gracias sobre todo a Robert Nemiroff (MTU) e Jerry Bonnell (UMCP) que son os pais da criatura.
