Ola,
Creo que non se debe descartar que sexa un satélite "case" xeoestacionario: A maioría dos satélites que están situados en órbitas GEO son xeosíncronos, é dicir, teñen un periodo de revolución en torno á Terra igual a un día sidéreo pero non teñen por que ter inclinación orbital 0º. As órbitas xeosíncronas poden estar máis ou menos inclinadas sobre o ecuador. Aparentemente, vistos desde a Terra, eses satélites desprázanse lixeiramente no ceo formando unha especie de "8" ou analema vertical moi estreito horizontalmente, que percorren en 23h 56m. Así que un movemento lento orientado practicamente ao longo da dirección Norte-Sur pode corresponder moi ben a un destes satélites.
Os xeoestacionarios son aqueles xeosíncronos con inclinación orbital 0º, situados directamente sobre o ecuador terrestre. Eses, como comenta Ramón, non se moven aparentemente.
O motivo de que moitos dos satélites xeosíncronos non sexan xeoestacionarios é que todo o mundo quixo poñer xeoestacionarios nos mesmos lugares (p.e. sobre o ecuador no centro do Atlántico para as comunicacións Europa-America) e o sitio xa non dá para máis 😉 Bo, metros cúbicos hai de sobra, pero non se poden amorear demasiados satélites nos mesmos slots orbitais entre outras cousas por problemas de interferenzas radioeléctricas. Así que pasado un certo tempo a xente comezou a poñer satélites á mesma distancia pero en órbitas inclinadas.
Debe haber alguna base de datos accesíbel na web onde verificar se é ou non un satélite.
Apertas,
s.
PS/ Outra posibilidade é que fose un satélite en "órbita lóstrego" (Molnya). Teñen periodos de 12h pero durante unha parte importante da órbita semellan moverse moi lentamente en dirección case norte-sur ( http://en.wikipedia.org/wiki/Molniya_orbit) Tendo en conta a relativamente alta declinación na que o fotografaches, podería ser unha opción probábel.