Ola a todos:
Aínda que hoxe non fai moi bó tempo (en Ames agora mesmo está a chover a cántaros) Meteogalicia prevé para mañán unha melloría significativa para boa parte de Galicia, sobre todo pola tarde. Se o tempo mellora o suficiente para poder observar, propoño facer unha proba sinxela dos medios técnicos que temos observando a ocultación da estrela beta Capricorni pola Lúa.
A ocultación produciráse en Santiago ás 20:27 TU polo lado non iluminado da Lúa e a reaparición produciráse polo lado iluminado ás 21:02 TU. Un problema que haberá é que a ocultación produciráse a só 14º sobre o horizonte W coa Lúa xa poñéndose, co cal, para observala, haberá que ter un horizonte despexado nesa dirección.
Dado que a estrela é moi brillante, magnitude ~3, é moi doada de localizar (e terá a Lúa ó lado!) e se usamos as cámaras Watec poderemos empregar calquera telescopio ou teleobxetivo fotográfico. Se empregamos unha webcam teremos que usar un telescopio con máis diámetro dado que as webcams son moito menos sensíbles. Tamén se poden usar outras cámaras de fotos acopladas a un teleobxetivo gravando en modo video.
Un aliciente que ten esta estrela é que é dobre, polo que a caída de brillo non será abrupta, senon que terá un escalón. Este é un bo momento para probar o instrumental que temos, PC de adquisición, tarxetas gráficas, sincronización horaria, etc... e logo analizar as imaxes usando Limovie, por exemplo, e obter algo de práctica.
Na seguinte ligazón tedes a información da IOTA sobre este suceso:
http://www.lunar-occultations.com/iota/bstar/1118zc2969.htm
Aparecen os horarios para A Coruña, Santiago e Vigo, pero non vaiarán máis que uns segundos para outras localidades de Galicia.
Un saúdo.
